Mae gwefan gofal a gwybodaeth iechyd wedi torri ei record o ymweliadau misol gyda chynnydd yn y defnydd deallus o dechnoleg gan borwyr y we.
Roedd gwefan Galw Iechyd Cymru’n ymateb i 112,125 ymweliad â’r safle yn ystod mis Mawrth, mwy na dwywaith y rhif oedd yn ymweld â’r safle yn 2011. A dyma’r trydydd mis yn ddilynol y mae’r wefan iechyd a chyngor wedi torri ei record a mynd dros 100,000.
Gall pobl sy’n teimlo’n sâl ac ansicr ynglyn â’r hyn y dylen nhw ei wneud alw ar y gwasanaeth 24 awr y dydd, bob dydd o’r flwyddyn. Ynghyd â’r opsiwn o gysylltu dros y ffôn, gall pobl hefyd ymweld â’r un cyngor a gwybodaeth ag sydd ar gael dros ffonau deallus, wrth glicio botwm.
Mae’r wefan - www.nhsdirect.wales.uk - yn caniatáu i ymwelwyr ddysgu mwy am eu hiechyd drwy’r gwyddoniadur ’ A-Z ac mae'n caniatáu i chi chwilio, yn eich amser eich hun, am ddeintydd, fferyllfa neu grwp cefnogi yn eich ardal ynghyd â chynnig Gwasanaeth Ymholiadau Ar-lein dwyieithog ar gyfer unrhyw gwestiynau am wybodaeth iechyd sydd gennych. Hefyd, gellir defnyddio’r Gwasanaeth Ymholiadau Ar-lein ar gyfer Gwybodaeth am Bresgripsiynau i’ch helpu i ddeall a rheoli cyflyrau tymor hir yn well.
Mae’r cynnydd yn y nifer o ymweliadau â’r safle o ganlyniad i ddatblygiadau mewn technoleg symudol fodern. Yn ystod mis Mawrth 2011, roedd technoleg symudol yn creu 9.35 y cant o ymweliadau’n unig. Blwyddyn yn ddiweddarach, roedd wedi cynyddu i ychydig dros chwarter yr ymweliadau misol ar 26.5 y cant.
Dywedodd Dr Paul Hughes, Cyfarwyddwr Meddygol Gwasanaethau Ambiwlans Cymru: “Rydym yn hynod o falch bod mwy a mwy o bobl yn chwilio am gymorth ac arweiniad drwy ein gwefan. Mae’n braf hefyd gweld bod mwy o bobl yn chwilio amdanom ni drwy ffonau modern sy’n golygu bod ein hystod o gymorth yn ehangu oherwydd bod technoleg boblogaidd yn datblygu’n gyflym.
“Os ydych chi’n teimlo’n sâl neu fod gennych bryderon iechyd, gallwch ymweld â’r wefan. Mae’n cynnwys cyfoeth o wybodaeth a bydd yn eich cyfeirio i’r cyfeiriad cywir i gael y gofal neu’r driniaeth rydych eu hangen ar gyfer salwch neu anaf.”
Beth am ymweld â Gwefan Galw Iechyd Cymru ar www.nhsdirect.wales.nhs.uk neu ffonio 0845 46 47 i gael cyngor a gwybodaeth iechyd.